2 Keunenks 05
01Naäman, aanvoerder van t leger van Aram, was bie zien keunenk slim in reken en ston bie hom hoog in aanzain. De HEER haar hom ja veur Aram n dikke overwinnen bezörgd. Mor dizze man, n groot kriegsheld, haar n hoedzaikte.
02Dou Arameeërs ais op roof oet wazzen, haren zai oet Israël n jonk wichtje mitnomen; dij dainde nou bie Naäman zien vraauw.
03n Moal zee ze tegen heur vraauw: "Kon boas mor ais noar profeet in Samaria. Dij zol hom wel van zien zaikte ofhelpen."
04Naäman ging noar keunenk en vertelde hom: "Zo en zo het dat wichtje oet Israël zegd."
05"Goa der toch hèn, man," zee keunenk van Aram dou. "Ik zel die wel n braif veur keunenk van Israël mitdoun."
Naäman ging op pad en nam tien talent zulver, zèsdoezend sjekel gold en tien stel van mooiste klaaier mit.
06Hai leverde braif òf bie keunenk van Israël. Der ston dit in: "Mit dat ie dizze braif kriegen, stuur ik mien knecht Naäman noar joe tou. Wees zo goud hom van zien hoedzaikte òf te helpen."
07Mor naauw haar keunenk van Israël braif lezen, of hai scheurde zien klaaier. "Bin ik God sums," raip e, "dat ik t te zeggen heb over levent en dood? Hai stuurt mie dizze man om hom van zien hoedzaikte òf te helpen. Dou der mor denk om: hai het wat tegen mie in t zin!"
08Dou godsman Elisa vernam dat keunenk van Israël zien klaaier scheurd haar, stuurde hai ain noar keunenk om te vroagen: "Woarom heb ie joen klaaier scheurd? Stuur dij man toch noar mie tou. Den zel e gewoar worden dat ter nog n profeet in Israël is."
09Dat zodounde ree Naäman mit zien striedwoagen noar Elisa zien hoes tou en huil doar ho.
10 Elisa stuurde ain noar boeten mit bosschop: "Goa joe zeuven moal wasken in Jordaan. Den wordt joen hoed weer geef en zel ie weer zuver wezen."
11 En helleg dat Naäman wer! Hai ging vot en zee: "k Haar toch docht dat e zulm wel noar boeten tou kommen zol, veur mie stoan goan en noam van de HEER, zien God, aanroupen. En den mit haand over t zere stee hènneweer bewegen en zo zaikte vothoalen.
12 Binnen revieren van Damascus, Abana en Parpar, nait veul beter as aal wotter van Israël? Doar haar k mie toch wel in wasken kind en zuver worden?" Maalkopt keerde hai om en ging vot.
13 Mor zien knechten kwammen achter hom heer: "Mor overste," zeden ze, "as profeet joe wat haile stoers opdroagen haar, den haar ie dat toch ook doan? Woarom nou den nait, nou e allenneg mor tegen joe zegd het: 'Wask joe en ie zellen zuver worden.'"
14 Dou luit Naäman zok in Jordaan glieden en ging zeuven moal kopke onder, zo as godsman zegd haar. En verachtjont, hoed wer hom weer zond, joa, net zo geef as n kinderhoedje, en zuver was e weer!
15 Dou keerde hai mit zien haile gevolg weerom, en dat noar Elisa tou. Hai ging veur godsman stoan en zee: "Nou wait ik dat ter naargens in haile wereld, gain God is as in Israël. Wil doarom n geschenk van joen knecht aannemen."
16 Mor Elisa zee: "Zo woar as de HEER leeft in dij zien dainst ik stoa: ik neem niks aan!" En hou of Naäman ook aandrong, hai dee t nait.
17 "As ie den echt niks van mie aannemen willen," zee Naäman, "wees den zo goud en geef mie teminnent n last grond mit, net zoveul as n koppel moelezels droagen kin. Ik verzeker joe dat ik nooit gain ovvers meer brengen zel aan aander goden, allenneg mor aan de HEER.
18 Ain ding mout de HEER mie den mor vergeven: as mien keunenk noar tempel tou gaait om zok deel te boegen veur Rimmon, leunt e altied op mien aarm. Ik mout den wel mitboegen in tempel van Rimmon. De HEER zel mie toch wel vergeven willen dat ik mie den deelboeg in tempel van Rimmon?"
19 "Goa mor gerust!" zee Elisa.
Naäman was nog mor amper aan vertrokken
20 of Gechazi, Elisa zien knecht, dochde: Mien boas het t dij Arameeër Naäman mor slim makkelk moakt deur niks van hom aan te nemen van aal wat of e bie zok haar. Zo woar as de HEER leeft: ik goa hom radjes achternoa en perbaaier nog wat van hom te pakken te kriegen!
21 Dat Gechazi achter Naäman heer. Dou dij hom aankommen zag, sprong e van zien woagen òf en runde hom in muit. "Aal goud?" vruig e.
22 "Joa hur," zee Gechazi, "dik in odder! Mor wat wil t gevaal, mien boas stuurt mie mit dizze bosschop: 'Der binnen net twij jongkerels van profetenploug oet t baarglaand van Efraïm bie mie aankommen. Wil ie heur n talent zulver en twij stel klaaier doun?'"
23 "Mit ale plezaaier!" zee Naäman. "Mor neem toch twij talent, man." En hai bleef der bie hom op aanstoan. Vervolgens luit e twij talent zulver in twij puten doun. Hai gaf dij mit twij stel klaaier aan twij van zien knechten, dij ze veur Gechazi oet druigen.
24 Dou ze bie stadswaal aankwammen, nam Gechazi haile boudel van heur over en luit manlu votgoan. Geschenken bestopte hai in hoes.
25 Dou hai zok weer bie zien boas meldde, vruig Elisa: "Woar komst heer, Gechazi?" "Ik?" zee dij, "k heb haildaal naargens hèn west!"
26 Mor Elisa zee: "Dochst dat mie t ontgoan was dat ter ain van zien woagen ofsprong en die in muit kwam? Mostoe zo aan zulver kommen, aan klaaier, aan olievehoven en droevetoenen, aan schoapen en koien en aan sloaven en sloavinnen?
27 Doarom zel hoedzaikte van Naäman veur aiweg op die en dien noazoaten overgoan!" Gechazi ging vot, zien hoed vol schilvers en as snij zo wit.
|
